2006-12-28 09:08 PM
~迷戀gi~
[轉]地鐵鬧鬼地點大曝光
[size=2]地鐵鬧鬼地點大曝光
地下鐵路傳出有鬼已經不是一個新話題，但今年七月十四的前夕，一名列車車長在行車途中死去，令地鐵員工
不禁將意外與鬼節聯想起來。再加上一向以來，地鐵員工都曾聲稱撞過鬼，更使員工不寒而悚。據地鐵員工向
本刊透露，地鐵公司不主張員工向內或向外談論這些問題，以免影響員工工作及精神狀態。雖然如此，員工之
間仍是不時聽到撞鬼事件，而時間和地點都非常清楚。在地鐵工作了二十年的陳先生就向記者表示，雖然他不
信鬼神，但在公司卻經常聽到同事在地鐵撞鬼的事。
地點︰九龍灣車廠
時間︰凌晨二時
車廠午夜維修
本身也是在九龍灣車廠上班的陳先生表示，在車廠撞鬼之事常有流傳。
其中一次是一名保安人員告訴他的，「地鐵車廠每晚都有保安四圍巡視，不過每次人去到維修工場的路軌附近
，就會不其然急急腳走。」陳指從前那位置就曾有怪事發生。
事情是，「有一晚大約兩點幾，有個保安又如常咁四圍巡邏，去到一架維修列車旁，見到有兩三個外國人在車
底下面做野，佢自己又唔識講英文，唯有去搵其他職員問佢地點解咁夜仲係度維修。」陳先生表示為了慳電，
車廠晚上時分的燈光很不足夠，如果一個人在又大又陰暗的地方，的確很恐怖。
「那個保安員之後搵到另外兩名同事一齊去，只見果度已經乜人都冇！另外中央控制中心果邊都話成晚都冇任
何承建商或其他人要做維修。」保安員始知自己撞到「污糟野」。
地點︰九龍灣至彩虹段
時間︰晚上
隧道口打鞦韆
另一個故事發生在觀塘線，陳先生指最少有二十多名列車司機曾有以下經歷，「如果講到事緣，就要講番二十
幾年前，果陣地鐵仲起緊，當起緊九龍灣至彩虹呢段路，發生過一宗工業意外，仲好似話有工人死。從此之後
，由九龍灣入彩虹隧道口都會有相同不可思議的事發生。」
「好多車長話夜晚都試過見到一個男人，係隧道口拉住條電線係度打韆鞦。佢地都話見到一個身穿白色工作衣
的男人，個樣就好模糊，睇得唔係好清楚。個個都話冇可能，因為條電線成千五伏特，咁高壓一個普通人連惦
都冇可能喇，更何況係拉住打韆鞦。」陳先生更表示有此經歷的同事，事後也會前往該處附近上香和拜祭。他
們大多相信該鬼魂正是當年因工死亡的工人，因為陰魂不散，而經常在隧道徘徊。
地點︰去柴灣車廠途中
時間︰凌晨
尾班列車女人
另一宗恐怖經歷是在柴灣車廠工作的同事告訴陳先生。一天約凌晨車長駕駛尾班列車前往柴灣站，到達時車長
便用廣播告訴乘客，「列車已經到達終點站，乘客請盡快離開車廂……」由於是尾班車的關係，車長需要由車
頭步行至車尾，一方面確保車廂內再沒有乘客，另一方面就是要將列車調頭駛回車廠。而車長均發現車廂內並
沒有任何乘客。當車長打算開車之前，他再一次用廣播告訴乘客不可再留在車廂之中，列車的門隨即關上，往
車廠方向出發。
在行車的途中，突然有一中年婦人邊敲擊車長的門一邊叫喊︰「我都未落車！」當車長聽到後，惟有用廣播告
訴該名婦人，「由於列車已經開出，去到車廠時，我們會派專車將你送返車站。」車長同時通知中央控制室，
要求準備車輛接載該名婦人。當列車到達柴灣車廠時，車長由車長室出來，打算找尋該名婦人。但列車上卻空
無一人，車長心想，「列車車門還未打開，該婦人應在車廂之中，也許她是往車尾方向行了過去吧。」這時候
，車廠的工作人員已經到達，他們一同由車頭行至車尾，並一邊檢查車上的氣窗及車門，均沒有開啟過的痕跡
。當他們達到車尾時，他們均不寒而慄，因為竟然一點發現也沒有。車廂中各人都很害怕，其中一人相信當時
正值「鬼節」，才會碰到這些事！
另一名曾於地鐵任職六年的阿賢，不諱言地鐵有鬼是每個職員均略有所聞的，「其實地鐵係地底度，陰氣自然
較重啦，好多同事都有撞鬼的經歷。」雖然阿賢表示自己時運高從未撞鬼，但他卻表示很多職員也有過恐怖經
驗。
地點︰荔景站
時間︰晚上
月台女鬼跳軌
「好多荃灣線的車長都好驚，因為荃灣線好多怪事。有一日，有個車長開頭班車，由荃灣開出，當去到荔景站
時就有怪事發生。」阿賢露出驚慌的表情，「當架車入站果陣，個車長見到有個女人跌左落路軌。」
車長肯定架車係撞到人，所以他立即向中央控制室報告，一陣間就有站員去檢查車底。
「但個結果係大家都估唔到！站員由車頭檢查到車尾，竟然乜發現都冇，唔好話個女人，就連血跡都冇。」而
該車長事後更大病一場。
地點︰荔景至美孚隧道
時間︰全日
小孩隧道玩耍
據阿賢所說，荃灣線又怎會只有以上一件恐怖事件。「另一單我聽到都嚇親！有好多荃灣線的車長都會有呢個
經歷。呢件事係發生係荔景至美孚站隧道裏面。」
「車長駛經條隧道果陣，去到中途就會見到有細路仔係度走來走去，但係當架車去到細路果度時，佢地又會突
然之間唔見晒！」記者回想起多年前九廣鐵路一個以小孩子在樹林中玩耍為主題的廣告，該廣告亦曾傳出其中
一個小孩的手指異常長了，更被認為是鬼手，想起已經令人毛骨悚然。
記者訪問了地鐵公會的主席陳善和]。他強調以下全是他個人意見，並不代表公會立場，因為鬼神這類東西－－
「信則有不信則無」。
「我本人唔信有鬼，不過係地鐵做左十九年，當然有聽過地鐵鬼故！」陳並不否認地鐵內的確傳出不少鬼故，
「或者地鐵的工作好多時都係要單獨一個人啦，好似車長，又或者係車廠度做野都係得你一個人，所以特別容
易傳出鬼故囉。」
「有時地鐵的工程都有發生過工業意外，亦曾經有一些站係有人跳軌，所以都會有人講鬼怪作祟。但係咪真實
就無從稽考。」
陳又有沒有聽聞過地鐵員工所提供的鬼故？「好似見到有人在地鐵的電纜上面打韆鞦、有細路仔係隧道度玩、
甚至係有人跳車之後失蹤都有聽過。不過印象唔係好深刻，因為鬼神呢樣野，聽過就算，都唔會記係心度。」
「比較印象深刻，懷疑有人跳軌之後唔見。果次報紙都有登過啦！個車長見到有個白影跌落路軌，之後搵唔到
跌落去果個人。不過呢樣事好多時都係聽番黎，當要搵返個當時人又搵唔到。」
荃灣車廠也有鬼
陳一直在荃灣車廠上班，原來荃灣車廠附近亦有怪事，「有幾條路會傳說話特別猛鬼，好似係荃灣車廠廿四路
，果度係用黎泊車，果度好多車長都話撞到，但我都去過好多次，都見唔到。」
「其實都有幾多人利用地鐵來自殺，都曾經有些同事係夜晚停駛之後，由負責檢查路軌的員工試過係路軌度見
到斷左手指腳指。」雖然這算不上是鬼故，但亦令人難以想像遇上這些事時可作出什麼應。「因為好多時跳軌
的人畀車車中手手腳腳，所以痴住路軌又冇執到，所以都唔奇。」
陳指在一般發生跳軌事件之後，地鐵公司方面亦會有所行動，「如果有人係地鐵跳軌，公司都會安排拜祭，因
為始終都係中國人社會，會燒元寶蠟燭，但求心安理得。而果班車個車長可以放三日假，或者做其他工作，叫
做冷靜下咁啦！如果個同事要求，公司都會安排心理輔導。」
陳亦不忘補充說，「如果你信係有鬼，做野果陣壓力就會大。咁不如唔信，反而做野果陣唔洗成日係度驚！好
似我咁，我都唔信有，所以即使去到盛傳有怪事發生過的地方做野都未試過撞鬼。」
世界邊處都有鬼
就地鐵員工撞鬼事件，記者訪問了香港鬼王鄧光華法師。鄧師傅不諱言，「呢個世界邊度都有鬼！」他表示，
「依家講鬼呢個話題已經去到好科學化，有些外國的國家或者係日本呢方面已經好進步，不單止有專門研究靈
體學會，佢地甚至可以用紅外線影到鬼。美國幾十年前已經有醫生成功咁測出靈魂的重量，亦有博士研究到靈
魂形狀。」
至於地鐵是否特別多遊魂野鬼喜歡聚集的地方，鄧師傅並不認同，「除非有一些地鐵站特別多人跳軌，先至會
咁多鬼，否則地鐵都係同一般地方冇乜分別。」
「如果話係地鐵見到鬼，多數都會係跳軌果個人本身好強壯，如果佢死果陣又有怨氣話，當佢再吸收外來的能
量就會好易成形，冇咁旺的人就好容易見到鬼。」
對於地鐵職員提供的撞鬼經歷，認為是有可能發生，「好似果個尾班車長聽到有鬼講個案其實都唔奇。不過聽
到鬼講都有真假之分，假就係你食藥，好容易會有幻聽，聽到未必真係鬼講。真係你本身係一個好正常狀態下
聽到聲，都會有呢個可能性。因為有一些特別鐘意騷擾人的靈體，佢地冇乜特別，只係想人知道佢存在。」
人鬼殊途互不犯
鄧師傅解釋，「如果一般人遇到鬼，除非佢天生有陰陽眼啦，如果唔係都係因為時運低所致。如果真係見到都
唔會有乜野，因為好多鬼都係好善良，唔會特登去搞你。但如果真係唔想撞到，都可以係身上帶一度護身符，
佢地就唔敢埋你身。」
對於世間有沒有鬼怪之說，精神科醫生陳仲謀表示他個人並不相信，「我梗係覺得呢樣野唔係真，只不過
係一個假象。」
陳醫生解釋，「其實有好多因素可以解釋點解人話見到鬼。最普遍有兩個因素，分別係心理因素同環境因素。
心理因素可以從一個人的心理狀態去解釋。好多時係人個心會形住有野，咁樣特別容易產生幻覺。而環境因素
就係四周環境可以影響一個人，令佢比較易有錯覺。好似近排好多人會話長洲好邪，因為好多人係果度燒炭。
所以，去到果度只要見到樹影，或者有風吹，就以為自己撞鬼。其實，只不過係人因環境影響佢地，而唔係真
係見到有鬼。」
疑心生鬼皆錯覺
陳醫生亦不忘補充，「有時群體壓力都會令到有些人以為自己撞鬼。如果一大班朋友話見到鬼，其他人話自己
見到鬼的機會就會大增。」
醫學界又怎樣解釋那些表示自己撞鬼人的是什麼原因導致？「所謂陰陽眼，醫學界會認為係人的腦電波出現問
題，發出一些錯誤訊息而有的幻覺。有好多種病人，例如而這個人有精神分裂、腦創傷或者係有羊癇症的人都
有可能有呢種情況出現。另外，依家年輕人好流行食Ｆｉｎｇ頭丸或者Ｋ仔，食完軟性藥物之後都可能有幻
覺。」
臨床心理學家梁若芊表示，若果一個人相信鬼神之說，有一些特別常識範疇解釋不到的經驗，便會認為自己撞
鬼。她指出，「其實當一個人好疲倦的時候，好容易見到有影前面飄過，其實呢樣係眼花，好多人都有呢種經
驗。如果人身處一個寧靜的地方，都有可能聽到一些怪聲，呢ｄ聲有可能係自己聲，又或者係聽到外界好少聲
音都有可能，所以都唔出奇。」
而地鐵對於員工撞鬼的事件並無作出回應，發言人林小姐指由於撞鬼這些事並無事實根據，因此不會回應有關
提問。
《恐怖熱線》接獲不少投訴
新城電台節目《恐怖熱線》女主持路芙亦向記者表示，「每個月最少有一至兩單有關地鐵的鬼故，好多時都係
地鐵職員打電話黎，以前都試過有站長、車長、維修人員同埋清潔工人打過黎。」「原來地鐵站長當有人跳軌
時，佢地係有責任去執屍。而其中有兩個鬼故都係同跳軌有住密切關係！」路芙憶述以住曾收過的來電內容。
「有一個係清潔工人打黎。佢話有一次有人跳軌死，站長就立即去將屍體移埋一邊。果陣呢間清潔公司都係第
一次接地鐵工作，點知去到清潔工人不斷用水去流血跡，但唔知點解洗極都洗唔到。」「後來佢地問返以前係
地鐵做過果的清潔公司職員，先知道原來做清潔之前，先要上香拜祭一番，講『我都係幫你，唔係害你！』這
類說話先可以洗。工人就跟住佢的說話去做，之後果然洗得甩。」
路芙亦表示曾地鐵的乘客與他們分享地鐵的撞鬼經歷，「試過有一次有個乘客由金鐘地鐵站轉車，當佢企係月
台果陣佢突然見到有個女人跳車，佢果陣不知幾驚，仲大叫添！
但係佢見架車完全冇意思停低，其他月台的人又冇反應，好似冇事發生咁。」
「佢覺得唔係自己眼花，而係其他人見唔到，佢就企係月台度等架車駛開。點知佢真係乜野都見唔到。回想才
知原來自己撞鬼。」
另外亦曾有一地鐵車長致電該節目，「果個車長話由牛頭角至九龍灣的架空路段上面見到有人放置左一個關
帝像係度。車長細問之下才知道原來在架空路段上有一部份係好近隔籬果條觀塘道曾經發生過一次好嚴重交
通意外，自此之後，條公路冇乜野，反而隔籬地鐵果段路就鬧鬼，所以有人係果度放左一個關帝像希望唔會
再有怪事啦！」路芙指以上只是地鐵鬼故的一部份而已。她認為致電至節目的聽眾所提出的鬼故真確性是頗
高。因為這個節目以分享為主，聽眾致電分享後亦不會有任何禮品，因此相信聽眾刻意編製鬼故的機會率並
不高。[/size]
2006-12-28 09:39 PM
西瓜仔a_a
h0驚ah! >vv<
有d冇睇哇! >vv<
2006-12-29 01:03 PM
mihoki1025
哇..*好驚>﹏<
我久唔久都好夜先搭地鐵-v-"
驚驚添...
2006-12-29 01:04 PM
mihoki1025
-v-自動發左2個回覆添...*
2006-12-29 05:52 PM
S0.J!LL`:)
ｈ0恐怖 -_- !
好得人驚 =_= !!!
2006-12-30 10:36 AM
kandy0614
嘩嘩嘩嘩嘩~嚇親啦~
好可怕丫~
2006-12-30 06:45 PM
tong:D
睇 到 呆 哂 .. > <
好 似 好 恐 怖 咁;;
2006-12-31 12:09 PM
ting_
真定假 ar ???
好 恐 怖 bo~~
2007-1-1 11:50 AM
月妍
好恐怖呀`
好彩搭親mtr都好多人啫