七言絕詩,,好抵死

深刻反映香港社會實況.......


看更原來識雞腸,　掃地都要寫文章;　學士碩士唔馨香,　因為博士都在場;

人工一定唔理想,　七仟左右已中上;　十二個月無雙糧,　兩年合約要裝香;

半年之內有工返,　已經算係好收場;　開工應該喜洋洋,　點知世態更炎涼;

管理之名樣樣理,　萬人之下一人上;　資源增值好榜樣,　以為發揮你所長;

光管燒左等你換,　影印食紙你當殃;　電話唔通都關事,　水廁唔通你清場;

電腦壞左要識整,　發現病毒要早響;　食飯最多半個鐘,　大小二便難舒暢;

中港兩地四圍走,　遲早去阿塞拜疆;　仲要出街收爛賬,　朝早做到午夜場;

公司人事要攪好,　唔係就李代桃僵;　對付下屬要讚賞,　對住上司要讚揚;

對待同事要禮讓,　對住老板扮羔羊;　老細個仔問功課,　資料搜集你擅長;

芝麻小事難迅 d,　唔識都要頂硬上;　上司老板夠無良,　病都要做鬼體諒;

同事犯錯有你份,　仲要鬧你正粉腸;　開會猶如打靶場,　比人插到啪啪響;

翻開肚皮睇全相,　鬧完仲要拍手掌;　工餘進修係妄想,　回家食飯無相量;

想話請假來休養,　老細面似屎一樣;　晚晚加班做七日,　唔通個個嫌命長;

日日返工似喪屍,　十足幾年無沖涼;　大假以為好安樂,　手提電話日日響;

運動要響公司做,　逐箱"快勞"搬埋牆;

老細生日當娛樂,　週年聚餐齊歡唱;　笑臉迎人裝模樣,　當正自己做歡場;

以上所講無誇張,　全是打工眾生相;　奉勸各位打工仔,　積極求存為至上;

年尾流流高危日,　偷懶都係咪咁揚;　香港打工係咁樣,　大聲疾呼"吹Q漲"