Angelababy（楊穎）剛剛從日本參與日本時裝界矚目盛事Tokyo Girls Collection秋冬時裝展，更與數百來自各地名模同台行Show，令她興奮莫名。日前回港，她急不及待走到銅鑼灣Shopping，睇衫之餘又狂掃日本CD，實行極速惡補日文！

　　早前盛傳Angelababy（楊穎）的經理人Kim開價800萬元，將「愛女」Baby賣給英皇，及後Kim否認此事，更坦言暫時未有意跟英皇合作，更對Baby視如愛女，是無價寶，可見Kim對Baby愛護有加。而Baby亦懶理香港一班o靚模你爭我奪，實行要全力進軍日本，早前她專程到日本參與日本時裝界矚目盛事Tokyo Girls Collection（TGC）2009秋冬時裝展，跟百多位名模同台行Show，雖然被諸葛梓岐及周秀娜追擊，但Baby依然覺得興奮。

　　日前，Baby剛從日本回港，她未有第一時間見男友陳偉霆（William），反而回到公司後，即時跑到銅鑼灣Shopping，上星期，一個傍晚時分，Baby坐着公司的保母車到銅鑼灣，Baby下車後便走到附近一間運動服裝店，但Baby草草逛了一個圈，不夠10分鐘便離開。

　　接着，她便轉戰附近一間大型唱片店，所以甫進店內Baby就先向新到的時裝及外國娛樂雜誌埋手，先買了兩本日本雜誌，之後又到另一邊睇CD和DVD。當日穿了一條超短熱褲的Baby，雖然已經戴了帽及太陽眼鏡，但很多人第一眼便認出她，對她評頭品足，可見其人氣極旺！不過Baby都未有理會，繼續埋首揀她心愛的CD。

　　由於要全面進軍日本巿場，又四面受敵，因此Baby要惡補日文，力求可以突圍而出，她在唱片店內逗留了接近1小時，但花較多時間在日文唱片及電影方面，逐隻碟拿起來細讀碟上的日文字，最後她一氣買了5隻日文碟，實行要回家勤習日文迎戰死敵！排隊付款時，Baby才有時間致電給男友，見她不時發出甜蜜笑容，然後，邊講邊跳上保母車離開。