揭秘 四大都市傳言 有真有假







今日食晏，同事話佢朋友個朋友，上星期在羅湖城俾人偷晒全部器官，死埋；夜晚上網，乜水 Forward 來的 Email話一氧化二氫好危險，會死人。日日聽到咁多似層層的都市傳言（Urban Legend），你信定係唔信呢？其實都市傳言係好有趣的社會現象，仲有唔少人專門搜集同研究都市傳言的源頭同散播過程。以下四個都市傳言，邊個真邊個假你又知唔知？




黑超特警


傳言講乜：美國經常有傳說，指當一個人遇到 UFO 或外星人後，就會有兩個全身穿黑衣、頭戴太陽眼鏡的東方人，以機械人般的聲音警告當事人，不可將事件到處宣揚。有人指黑衣人是指美國政府某個秘密機構的人員，以騷擾和恐嚇的手段壓制 UFO 事件，官方則從未承認此事。




真定假：冇人知！


事件始末：黑衣人與許多其他陰謀論同時出現，有人認為所謂的黑衣人，是由於50年代的政治環境，麥卡錫主義使許多人士遭到逮捕，再加上冷戰的氛圍而產生的對政府不信任感和缺乏安全感的表現，繼而流傳至今。到底係咪有黑衣人呢？至今無人可以解答呢個問題，不過荷里活就將事件借題發揮，拍成娛樂性十足的《黑超特警隊》（Men in Black）。






月觀長城


傳言講乜：呢個傳聞由細聽到大，甚至老師都話過俾你聽，原來響月球上，唯一可以睇到的地球建築物，就係中國的萬里長城，令我們偉大的中華民族感到非常驕傲，威威！




真定假：假！


事件始末：1932 年，美國一齣卡通片集《Ripley's Believe It or Not!》介紹萬里長城時，曾經指出「萬里長城係全世界最偉大的建築，更可能係月球上唯一可以睇到的地球建築物」，首次出現類似的講法。其後數年，作家 Hendrik Willem van Loon 同 Richard Halliburton 亦曾在他們的著作中提出類似的講法，不過當時人類從未試過衝出地球，呢個講法只係一味靠估。其實長城的寬度只有大約 9.1m，又唔會發光或反光，同旁邊土壤的顏色反差亦不大，上到太空人類單憑肉睇根本無可能睇得到，連楊利偉上完太空，都話自己睇唔到長城啦！






迷暈偷腎


傳言講乜：你一定收個呢個電郵，話某人在酒吧認識一個艷女郎，兩人好開心咁上酒店，仲飲�鬫n多酒，之後某人就昏昏大睡。某人醒來之後發現自己浸泡在浴缸之內，旁邊有封信話佢兩個腎已經被割去，要立即報警保命。某人摸一摸腰後方，果然有兩個傷口……




真定假：假！


事件始末：據專門研究都市傳言的網站 Snopes.com 指出，呢個傳聞源自英國一件真人真事，一個曾涉嫌兜售自己器官的土耳其男子，聲稱被騙到英國打工，然後去到一家美侖美奐到佢以為係酒店的醫院「驗身」，點知被人迷暈割腎，之後佢仲收到一筆鉅款作補償，最後更鬧上法庭。後來美國有電視劇集改編呢件事，到 96—97 年間就開始在網上流傳，仲愈傳愈勁，其後香港電影界將呢件事改編，拍�鷵桯q影《救命》添！






水渠鱷魚


傳言講乜：好多城市的地下水渠都有鱷魚出沒，原因係有人養鱷魚養唔掂，索性沖落廁所就算，點知鱷魚在水渠內竟然快高長大生兒育女。有�讔羲k仲誇張，話鱷魚會在馬桶內伸個頭出來咬你 PatPat，所以大家去廁所時要小心。




真定假：真！


事件始末：1935 年２月10日，一群住在美國紐約的年輕人，在哈林河畔其下水道捉到一條鱷魚，事件更被刊登《紐約時報》。原來30年代美國東南岸鱷魚皮革業相當興盛，紐約人則視飼養小鱷魚為標奇立異的行為，不過真係有好多人養唔掂條鱷魚，就將佢放生或者沖入馬桶中，以為可以一了百了，成為鱷魚在地下水渠出沒原因。至於被香港人視為寶貝的山貝河貝貝，更加係水渠鱷魚的現代版！另外早前日本金澤市，亦曾出現過幼鱷被棄在水渠內的情況。

  

--------------------------------------------------------------------------------


  

--------------------------------------------------------------------------------


  

--------------------------------------------------------------------------------


  

--------------------------------------------------------------------------------


  

--------------------------------------------------------------------------------